Llingua Asturiana en toles escueles

Serxu Solares
El prósimu sábadu Uviéu acueye una vegada mas una manifestación pa esixir el tratamiento dignu de la nuesa llingua que nun ye otru que l’oficialidá, va ser a les 13 hores y saldrá de l’estación de Renfe, está ta entamada pelos sindicatos SUATEA, FETE-UXT y CCOO, amás de pola Xunta Pola Defensa de Llingua Asturiana. La Conseyería d’Educación presentó una propuesta par currículu d’Educación Primaria, na que la nuesa llingua, lloñe de meyorar les murnies condiciones d’anguañu, pasaría a ser una asignatura optativa en competencia con otres materies o conteníos que quedarien a discreción de ca centru, alcontramonos de nueu con un claru fechu de discriminación pa los neños y neñes que quieran deprender l’asturianu, al nun poder recibir la mesma formación o refuerzu n’otres materies que los que nun la escoyeren. Creo que el nuesu gobiernu y tamien nosotros como partíu necesitamos entamar a facer un seriu debate internu, y tomar de verdá en cuenta lo que ye una reivindicación hestórica de cientos d’asturianos y asturianes dende tiempos de la transición, ye gracioso como tornen les coses y lo males que son les hemeroteques, pero l’actual cabezaleru de la Conseyeria, el Sr. Riopedre, apaecía nel archivu de semeyes de la coleición “Asturias. El siglo XX en imágenes”, que distribuye La Nueva España, nel primer numberu, nuna manifestación garrando una pancarta cuyu títulu yera “Bable a la escuela”, también lu acompañaba otru hestóricu socialista Jesus Sanjurjo, esti nun ye otru datu hestóricu que demuestra que el socialismu asturianu abanderó la defensa de la Llingua Asturiana, incomprensiblemente güei ya nun ye asina y nun termino d’entendelo, la Oficialidá del asturianu, ye una necesidá pa seguir teniendo esti importante fechu diferencial d’Asturies y renunciar a ello, ye comu tirar pela borda una parte perimportante de la nuesa cultura, yo soi socialista y tamien miembru de la executiva de l’Agrupación Socialista de Xixón, como yo otros miembros, ca vegada mas d’esti partíu facemos compatible el defender la nuesa llingua y ser socialistes, pero la verdá ye que munches vegaes pónsenos perdificil, y faesenos sentir mal cuando escuchamos dalgunes declaraciones que res tienen que ver cola realida, d’esti país y por supuestu d’esti partíu. Supongo qu’una vegada mas alcontrareme n’Uviéu con compañeros y compañeres que nun tendremos pancarta embaxu la qu’atechanos, pero creo qu’esti tema, nun tien que tener sigles y tien que sacase de la disputa política, ye necesario sumar y non dividir, per ello espero que’l sabadu seamos munchos/es.