AFAYÁIVOS

AFAYÁIVOS na llingua asturiana, toi emocionáu, incluso saltáronseme les llarimes cuandu pudi lleer el sábadu en LA NUEVA ESPAÑA, comu la conceyala y llider del PP en Xixón Pilar Fernández Pardo, abría les puertes de par en par a l’asturianu nel so partíu, pero casi dame mal cuando lleo “Pardo, censuró l'actitú pesllada y pocu dialógante, que’l PSOE mantien cola política llingüística”, eso si que ye de partise’l pechu, el Partido Popular, foi y ye lo mas reaccionario que pudo alcontrase la llingua asturiana fasta’l día de güei; por supuestu que’l PSOE, nun trata a la nuesa llingua con tol ciñu que debería tratase, por supuestu que’l mio partíu tien una asignatura pendiente que dende dellos sectores internos-y demandamos, l’Oficialidá, pero d’ehí a tener qu’escuchar que somos zarraos y pocu dialogantes, eso ya paezme muncho, podemos facer un mínimu repasu que quiciabes, seya interesante. La memoria a vegaes fállame, pero yo enxamás vi a un políticu del PP, falando nun actu oficial n’asturianu, y ya vilos del PSOE, presidentes comu Pedro de Silva o Antonio Trevín, emplegaron la nuesa llingua en dellos discursos oficiales, tamién vi a dellos conseyeros y conseyeres y por supuestu a miembros de la executiva del Partíu como ye’l mio casu, tamién podemos facer una pequeña comparanza de los dos Conceyos mas importantes d’Asturies, Xixón y Uviéu, nel primeru Gobierna'l PSOE, nel segundu'l PP, el de la política pocu dialógante, tien una oficina municipal de la llingua, edita material oficial n’asturianu, tien señalizaes billingües delles dependencies publiques, les cais, los nomes de los barrios rurales y la señalización de la ciudá, por supuestu a l’entrada ta Xixón/Gijón y tamién nos mupis de Conceyu d’escelencia turística, dalguna publicidá institucional, etc, bono, ye pocu, pues pue ser, pero por supuestu ye un empiezu, ye una manera de normalizar el nuesu idioma, ¿Qué ye lo que fai'l Conceyu d’Uviéu, gobernáu por partíu dialógante, ye dicir el PP?, res o pocu mas que res. Allégrome permuncho que teis nesti llau del ríu, pero nun queráis facenos creer a los asturianos/es y especialmente a los que llevamos tiempu peleando por esto que vais venir a salvar la llingua asturiana y que tolo que se fexo fasta agora nun foi res, y l’exemplu mas claru tenéislu nel que foi l’xunicu presidente d’Asturies del PP, Sergio Marqués, que tien doble delitu, por qu'amás de refugar la llingua agora tien el rostru de seudodefendela col partíu que montó y que fixo daqué paecío a lo que tais faciendo vosotros, apuntase al carru pa ver si arrancaba dalgún votu, pues lo dicho, AFAYÁIVOS, que cuantos mas seamos meyor.